जुम्ला : जुम्लाको हिमा गाउँपालिका-६ स्थित पाथरखाेला गाउँकाे एकघरमा आगलागी भएको छ। शनिबार दिउँसो करिब २:३० बजे साे घरमा आगलागी भएकाे हाे । आगलागी हुँदा घरमालिक तारा शाही बेहाेस अवस्थामा फेला परेकी थिइन् ।
घरमा भिषण आगलागी हुँदा ठूलो क्षति भएको छ। घरका सबै सदस्यहरू बाहिर काममा गएको समयमा सोलारको तार सर्ट भई आगलागी भएको प्रारम्भिक जानकारी प्राप्त भएको हो । आगलागीका कारण घरमा भएको चालिस हजार नगद, लत्ताकपडा, अन्न, र भण्डारण गरिएको सामग्री पूर्ण रूपमा जलेर नष्ट भएको छ। साथै, आगोमा २ तोला सुनसमेत जलेर नष्ट भएको प्रहरी सहायक निरीक्षक डेनी थापाले जानकारी दिनुभयो ।
उनका अनुसार आगलागीले पीडित परिवारलाई ठूलो आर्थिक नोक्सानी भएको छ।`घटना दिउँसो करिब २:३० बजे भएको हो,´ उनले भने, `उक्त गृहिणी तारा शाही घटनापछि बेहोस अवस्थामा फेला परेकी छिन्।´
उनलाई तत्काल स्वास्थ्य परीक्षणका लागि स्थानीय स्वास्थ्य संस्थामा लगिएको छ हालसम्म उनको स्वास्थ्य अवस्था र अन्य विस्तृत जानकारी प्राप्त हुन बाँकी रहेको प्रहरीले जनाएको छ।स्थानीय बासिन्दा र सुरक्षाकर्मीको सहयोगमा आगो नियन्त्रणमा लिइएको थियो।
घटनापछि स्थानीय तहले प्रभावित परिवारलाई तत्काल राहत उपलब्ध गराउन पहल गरिरहेको छ।
जुम्ला दर्पण । ८ मंसिर २०८१, शनिबार १७:१८