तातोपानीका विकट मानिने दुईवटा वडालाई पालिका मुकामसम्म जोड्ने सडक सुचारु, स्थानीय हर्सित
तातोपानी गाउँपालिकाका दुई विकट वडालाई पालिका मुकामसम्म सहज पहुँच प्रदान गर्ने उद्देश्यले निर्माण गरिएको सडक सुचारु भएको छ। तातोपानीदेखि तराफी
सम्म यसअघि नै सडक पुगिसकेको थियो।
तातोपानी गाउँपालिकाले दुई आर्थिक वर्षमा गरी जम्मा ६० लाख बजेट विनियोजन गरेपछि सडक सर्मी गाउँसम्म पुगेको छ। सर्मीमा सडक पुगेसँगै पालिका मुकाम पुग्ने सहज विकल्पको परियोजना सफल भएको छ।
बुधबार उक्त सडकको उद्घाटन तातोपानी गाउँपालिकाका अध्यक्ष नन्द प्रसाद चौलागाईंले रिवन काटेर गरेपछि स्थानीय स्थानीयवासीमा नयाँ आशा र खुशीको संचार गरेको छ।
७७ वर्षका स्थानीय कुँवरले भने, “अब तिला गाउँपालिका हुँदै तातोपानी जानुपर्ने लामो बाटो हिँड्नु पर्ने छैन। सजिलै लिताकोट पुगिने भएको छ।”
सडक सुचारु भएसँगै तातोपानी गाउँपालिकाका ७ र ८ नम्बर वडाका बासिन्दाहरूले लामो समयदेखिको बाध्यता र कष्टबाट मुक्ति पाएका छन्। यसअघि यी वडाका जनताले तिला गाउँपालिका हुँदै यात्रा गर्नुपर्ने बाध्यता थियो, जसले उनीहरूको दैनिकीमा ठूलो असर पारेको थियो।
अब भने आफ्नै पालिकाको सिमानाबाट सिधा आवतजावत सम्भव भएको छ, जसले स्थानीयबासीलाई समय, पैसा र श्रम दुवै बचत हुने अपेक्षा गरिएको छ।
तातोपानी गाउँपालिकाका अध्यक्ष नन्द प्रसाद चौलागाईंले सडक निर्माणलाई आफ्नो नेतृत्वको ठूलो उपलब्धि मान्दै भने, “हामीले विकट क्षेत्रलाई पालिकाको केन्द्रसँग जोड्ने योजना सफल भएको छ। अब यो सडकको स्तरउन्नतीमा ध्यान दिनुपर्ने समय आएको छ, जसले गर्दा यहाँका जनताले थप सहजता पाउन सकून्।”
गाउँपालिकाकी उपाध्यक्ष रेवती रावलले पनि भावुक हुँदै भनिन्, “७ र ८ नम्बर वडाका जनताले हामी वञ्चित छौं भन्दा मन चसक्क हुन्थ्यो। अब उनीहरूको यो पीडा हटेको छ र सहज यातायातको पहुँच पुगेको छ।”
त्यस्तै प्रमुख प्रशासकीय अधिकृत तीर्थ बहादुर कठायतले सडक खन्ने र गाडी पुगाउने काम सफल भएको भए पनि सडकको स्तरउन्नतीको काम अझै बाँकी रहेको बताए। “पालिकाले तत्काललाई आफ्नै पालिकाभित्रको यात्रामा अर्को पालिकाको बाटो प्रयोग गर्नुपर्ने बाध्यता हटाएको छ, जुन ठूलो उपलब्धि हो,” उनले भने।
यद्यपि, उनले सडकको गुणस्तर सुधार र दीर्घकालीन टिकाउपनमा जोड दिने आवश्यकता औंल्याए।
सडक सुचारु भएपछि तातोपानी -४ का वडाअध्यक्ष अमर बहादुर रोकायाले सडक निर्माणको महत्व बुझाउँदै भने, “यसअघि बजेटका लागि सुर्खेत र काठमाडौं धाउनुपथ्र्यो। अब गाउँमा नै सिंहदरबारको अनुभव भएको छ, जुन हाम्रो लागि ठूलो राहत हो।”
यस्तै, स्थानीय सुर्य बहादुर बुढाले सडक ट्राक खुल्नुले आफूहरूको जीवनमा सुखको आशा जगाएको बताए। “अब हामीले सिमा पारि जस्तो महसुस गर्नुपर्ने दिन गए। आफ्नै सिमाबाट आवतजावत गर्न पाउनु ठूलो कुरा हो,” उनले खुशी व्यक्त गरे।
सडक सुचारु भएकै दिन तातोपानीका -७ का स्थानीयबासीले पहिलो गाडीलाई भव्य स्वागत गरेका थिए। गाउँपालिकाका जनताले यो क्षणलाई नयाँ सुरुआतको रूपमा लिएका छन्, जसले उनीहरूको दैनिकीमा सकारात्मक परिवर्तन ल्याउने विश्वास गरिएको छ।
डिल्ली कामी । १९ चैत्र २०८१, बुधबार २१:२५